Aizawl FC 3 : 0 Sikkim United

Inkhelh tan dawnah Aizawl FC player ten Malsawmthanga Hriat rengna Banner an keng.

Aizawl FC chuan min tawngtaipuitute zarah kan tum ram hmasa chu kan thleng ta. 2nd Division I-League Group match hnuhnung berah United Sikkim chu 3-0 a hnehin Final round kan khel thei dawn ta a ni. Pathian hnenah lawmthu kan sawi tak meuh a, min tawngtaipuitu leh min duhsaktute zawng zawng hnenah lawmthu kan sawi bawk e.

Vawiin inkhel a Aizawl FC tana pet luttute hi Abey (11 minute), Michael (20 Minute), Biaktea(87 Minute).

Vawiin inkhel kan chakna hi a thihthlenga min tantu Malsawmthanga tan kan hlan a, Aizawl FC hian a hre reng tawh dawn bawk a ni.

Aizawl-ah all star match kan hmu leh dawn

Mizo Football Management Group (MFMG) chuan May ni 19 (Inrinni) khian Aizawl Sipai Lammual ah Football match ropui a huaihawt dawn a, hetah hian Mizo footballer India rama lar ber ber, India international players rual leh I-League Second Division Club Aizawl FC te an inkhel ang.

I-League season a zo fel chiah a, Mizo player te an rawn haw mek a, Jeje Lalpekhlua leh Shillong Lajong Captain Samson Ramengmawia leh a teammate te pawh an rawn thleng tawh a, midang an rawn thlen belh zel dawn a ni.

He inkhel atanga sum hmuhchhuahte hi Aizawl FC supporter Malsawmthanga, Sakawrdai khua, Silchar a Aizawl FC inkhel a enna hmuna nunna chan ta chhungte râlna tur leh Mizo Professional Footballers' Association (MPFA) in pawl anga midangte a \anpuina tur a ni a, Zemabawk Cancer Hospital a damlo harsate an tanpui dawn a ni.

Aizawl FC president Pu Robert Romawia Royte chuan, "Vai club a khelte chu Mizo tlangvalin lo sawp hrep ila ni mai alawm" a ti a. East Bengal defender Robert Lalthlamuana chuan a la na deuh nge ni, "I-League second division ho hneh loh chu a chi bik loh ang, kan ti mai mai dawn lo, ka va phur tawh e..." tiin a lo chhang lêt. An khua Hnahthiala awm mek Jeje pawh a phur tawh hle a, Saihaa awm mek S. Beikhokhai pawhin Aizawl a rawn phei ngei a tum thu a sawi.

Aizawl FC Vs Sikkim United

A Ni kan thleng a, a hun a thleng dawn ta. Silchar lam panin Aizawl FC Player-te tawiawm turin mi engemawzat an chhuk thla mek a. A then chu mahni awmhmunah tawngtaina nen kan tang bawk. Kolasib leh Vairengte lamah pawh inkhel entum an inpuahchah tan a, Nizan lamah Vengrengte YMA mic atangin vawiin inkhel a thei a piangte entura ngenna an puang dum dum tawh a. Silchar lamah Mizo awm ho te an inhawrkhawm a, Hmar Student Association lam pawhin an member thi ta pualin he inkhel en tum hian an inpuahchah nasa hle bawk a ni.

Vawiin inkhel tur hi Aizawl FC tan kan kal zelna tur hma min hruaisak thei a nih avangin Player-te pawh leh a enkawltute pawh an inpuahchah nasa hle mai. Zara tih loh chu Player-te an damkim thawkhata, chutihlaiin kan center back, midum Chully erawh inkhelh hmasaka red card hmuh avangin a inkhel thei dawn lo thung a ni.

A hnuaia mi hi vawiina Aizawl First Eleven tur leh Substitute a thu tur te chu an ni e:

Kenneth (Goal Keeper), Defenders: Lawma, Zuala, Chhuantea, Samba, Midfielders: T-a, Sawmtea, David, Biaktea, Strikers: Michael, Abey

Substitutes: TP-a, OP-a, Valpuia, Zirtea, Papuia, Rammawia (BVT)

Chawl tur: Rammawia (ITI), Chully (Red Card), Zara (Inhliam).

Aizawl FC Academy fehchhuak

Manchester United Premier Cup khel turin Aizawl FC Academy Under 14 team chuan nimin (29th April, Sunday) khan Lengpui atanga thlawkin Kolkata an thleng a, vawiin lam hian an khelhna tur hmun JRD TATA Sports Complex, Jamshedpur an pan ang.

Aizawl FC hi Group C ah awmin Manipur, Orissa leh Punjab nen an awm ho a, state aiawha chhuak club-te hian academy fumfe tak an nei vek a ni.

Fixture chu hetiang hi a ni:

May 2

3:00pm Aizawl FC v Manipur

May 3

8:00am Aizawl FC v Orissa

May 4

3:00mpm Aizawl FC v Punjab

Group tina champion te hian semi final an lut theuh ang a, Aizawl FC hi an tlang a nih chuan semi finalah Group D champion an tum ang a, finala lut pahnihte hian Goa ah final round an khel dawn a ni.

Aizawl FC Academy enkawltu Francis Paul chuan, "Manchester United Premier Cup hi kum 15 hnuailam inelna ni mahse kan Under 14 team kan in tur a, chakloh huamin kan khel dawn a, India rama club thate academy elpha tur hian nikum lam atangin theihtawp chhuahin hma kan la a, tunah Mizoram Football Assaciation in kal phalna min pek avangin lawmthu kan sawi a ni. Academy inelna a nih avangin chawl mang lova kan training thinna chuan kal theihna a hringchhuak a, hei hi kan lawm lehzualna a ni", a ti bawk. Aizawl FC hi academy coach Gosen Rammawia leh Manager C. Vanlalhriatrenga ten an hruai a ni.

Aizawl FC tan fiahna hun pawimawh: Chak kan mamawh.

Mizo thalai leh thalai lo ten kan sawi thin, kan dream thin. India ram league sang bera kan khelh theih hun tur hi. Mizo te Football-ah hma kan sawn kan inti a, kan skill pawh a tha kan ti fo thin bawk. India ram State te zingah football ngaihsan berna State te zing a mi a ni. Chuti chung chuan India ram Top League-ah team kan la thawh lo a, kan thawh lo mai pawh ni lo-in a khelh tum pawh kan la awm mumal lo.

Mizo te tan hun tha a rawn inhawng a, Aizawl FC hmangin chu chu a thlen theih dawn leh dawn loh naktuk chawhnu dar 2:45 hian fiahin a awm dawn ta e.  India ram Football club-te in elna sang bera tel thei tur zawnna hmasa hi Mizo te hian kan paltlang thei dawn em?

IInd Division I-League khelh mekah kan group atangin United Sikkim chuan Point 13 hmu-in Final round an inpetthleng tawh a. Arhima FC chuan Point 11 hmu-in an dawt a, Aizawl FC chuan point 10 hmu-in pathumna kan ni mek a. Arhima hian an khelh tur zawng zawng an khel zo tawh a, Aizawl FC te hian khelh khat kan la nei. Kan khelh tur la awmah hian kan chak a nih chuan I-League Second Division Final round kan khel thei dawn a ni.

Group Match hnuhnung ber en tur hian Mizoram atang pawhin Aizawl FC hruaitute bakah, MFA hruaitute, Jeje Lalpekhlua leh kan club Ambassador Irene-i te pawh an kal dawn a, Kolasib leh Vairengte atang pawhin engemawzatin kal an tum bawk a ni.

Mizo mipui te rilru leh taksa lama tanpuina kan mamawh a, Pathian ringtu kan nih angin in min tawngtaisakna kan ngen a ni. A thei apiang Silchar lamah kan player te tanpui turin liam thla ila, mahni awmhmunah pawh chakna an chan ngei theihna turin Pathian hnenah i dil ang u.