Aizawl FC

Final ni zet chu match han review tur pawhin a mumal theih ta hauh loh. Aizawl FC fans thutkhawmna ah "tra lala lala" tiin kan au reng bawk si a, fb ah update ve zeuh zeuh a lo ngai bawk si game a study hleihtheih loh a ni. Goal pathum lai a build-up na nen ka lo en fuh lo tlat mai. Engpawh ni se kan hmuh dan chin leh Aizawl FC fans entheilo leh enhmanlo te hriat ve atan hrim2 post leh thuai mai ang.

 

LINE UP: MSa(GK); Defense- Zohmangaiha, Dinpuia, Thomas, Zirtea; Midfield- Tluanga, Johnny, Brandon, Rammawia; Forward- Papuia & Michael

Substitute: Zorema, Zuala, Francis, Rina, Tlanhlua, Aruattea, Valpuia, Eddie.

 

Inkhel chanchin:

Inkhel hi an tan atangin kan pawl te ball nawr a na zawk nghal a. Hemi kan nawr kal zelah minute 10 a la ral hma in kan right back Thomas an ding lam atanga ball tha zet a rawn cross chu Rammawia(RW) chuan mawi zetin keeper man phak lohin a head goal nghal. He goal hi Aizawl FC fans thutna lam a goal a ni bawk a, a goal a mawi tak zet a, fans hmaa Rammawia goal celebrate chuan fans thawm a kaitho tha kher mai. MRP hian tan khawh an tum viau na a, 1st half tir lam minute 20 thleng chuan Aizawl FC in kan nawr a na zawk a, tumkhat Striker Papuia'n D-Box pawn atanga goal ni mai awm a tha a long shoot MRP keeper lo save kha a uiawm hle bawk. Hemi hnu lawkah hian kan Striker Michael a ball lalut chu D-Box chhungah lehlam right defender in "two-footed slide" tak meuhin a tithlu a, hei hi penalty pek awm tak a ni, mahse referee chuan a ham tlat lo. Game a rei tual tual a, kan player te an inthlah dul vang pawh nilovin MRP hian game an rawn insiam tha a, 1st half chanve hnulam hian an chungnung zawk tan a, kan lamah an rawn nawr hlauhawm thin hle. Minute 30 hnu lam (niin ka hre ta) ah MRP hian 'equaliser' an rawn thun ta mai reng a. He goal hi keini defense lam tihsual vang a tih theih awm e. MRP lam hi an FIT zawk a, an che a rang zawk tual tual bawk a ni. Tichuan 1st half an indraw dawn emaw tih hnuah, hun tawp dawn retah(45+1 vel) MRP bawkin kan marking thatloh vangin an ti goal leh zui ta a ni.

 

2nd Half tan rualin kan left back Zirtea (VC) chu thlakin a aiah Zuala (right back) a lut a, Thomas chu left back ah sawn phei a ni. MRP in 2nd half pawh an game an la thlak chuang lova, kan player te ball lak apiang an "close-in" hman zel avangin kan midfield ten space an nei hlei theilova. Duh angin midfield te'n nidanga passing game tha thin an nei thei tlat lo. Hei vang hian kan winger te pawh beisei angin an che hleithei lo a ni. MRP te an thothang a tha si a, ball hlauhawm tak tak an midfield ten an rawn vawrh phei a, an winger tlanchak te'n kan defender te an tibuai thin hle. An goal thumna an thun hma lawk hian vawikhat bar an pet per tak pawh kha goal thei tura hlauhawm a ni. 2nd half laihawl velah hian nidang phalo Johnny chu Francis an a rawn thlak ta a. Mahse kan insiam rem tak tak hmain minute 70 (velna) ah MRP hian kan defender te tihsualah bawk goal an rawn nei leh ta. Kan defender te ball clear mai loh avangin ball an rawn um lut a, an striker tlanchak Valpuia chuan kan keeper MSa ball zawng up laklawh tak thlen hmain a rawn pet goal leh a. Hemi hnu lawkah hian MRP player pakhatin double yellow card hmuh vangin red card chawiin a chhuak ta. Substitution hnuhnung ber atan Zorema rawn lutin Brandon a rawn thlak a, kan team an tang thar sauh a, reilote hnu ah kan striker Michael-an goal nalh zet D-Box chhungah la lutin a pet goal ta. Kan player te'n "equaliser" goal neih ngei tumin an bei a. Hun tawp tep a Michaela ball lakluh bawk lehlam left defender in D-Box chhungah chiah a lo tihtlu leh a, hei hi penalty pekna awm tak nimahsela, referee in a ham lo leh a, tichuan hun a tawp zui ta. Kan chak ta lo.

 

Kan vanneihni a thleng talo:

Vawiin Final ah khan MRP te an khel a "MATURE" hle a, ball an um taima a, an FIT zawk bawk a, chak an phu ve reng a ni. Chutih laiin kan player te pawhin theih tawp an chhuah a, hun tawp dawnah khan "equaliser" goal kha han thun leh hram hman sela chu beisei a sang zawk daih thung. Chak chang a awm a, chakloh chang a awm tel bawk tur reng a ni. Kan vanduai a thleng kan ti ve thei bawk ang. Player dangte chhe bik an awmlo chungin, Kan player hmatawng chi vek inhliam vanga chhawr theihloh pali ngawt -Sawmtea(C), Albert (RW), Rintluanga (Striker), Ramenga(Striker) kan neih avang te leh kan left-back rinrawl Ricky-a red card vanga hrem tawk kan chhawr theih loh kan tuar hle bawk a ni. Coaching staff rilru a buai thin hle a, player rem chungchangah an fakawm thlawt, Final ni ah pawh an ngaihtuah lawk leh hisap lawk te ngaihtuahin pakhat mah tihsual an nei lo a tih theih a ni.

 

Kan team an fakawm:

Tun hnaiah Aizawl FC player te aia game khel hnem an awmlo. MPL Play-off ah game hautak leh hahthlak zet zet pasarih(7) an khel zo chauh a, Sunday chauh chawlh neiin I-Day Trophy an khel chhunzawm chho leh char2 nghal a. I-Day Final hi telhin match ruk(6), a vaia belhkhawmin match 13 lai an khel zawn chho zui tawh a, Final ah an chau tawngkhawng tawh emni aw a tih theih a ni. Final-a kan tumpui MRP te erawh khan I-Day chauh competitive match an la khel a, match ruk (6) chauh an khel tling awrh a ni. Sipaia khela tura lut hrim2 annih sa avang leh hun rei tak chhunga Mizorama a tha tha lakkhawm te niin anlo inkhel ho nasa tawh hrim2 bawk nen an game a chhe ngailo thin reng reng bawk a. Heti chung hian kan team hian hun tawp lamah an lehthal hman tep tho kha kan team "fighting spirit" tha tak a lang leh chiang hle a ni. MRP khel hrim2 sawi chiatna nilovin, rilru te te chuan MRP khan a zawn zata an game 13-na khel ni ve se result a dang thei ngei ang ka ti.

 

Discipline neilo tia an hrem khan FAIR PLAY dawng:

Khati taka MFA Disciplinary Committee in Press Note nen meuha MPL Play-Off ah hmingchhe taka kan team chunga hremna an lekkawh lai khan kan rilru a na hlawm hle a nih kha. Kan team in "Appeal" na kan thehluh pawh insawifiahna hun min pe ve miahlovin hrem kan ni a. Referee kutthlak tih te leh thil dang neuh neuh, tak tak ni si lova dawt tinrenga relna kan tawh te kha ngawi rengin kan tuar tlawk tlawk a, mahse MPL Play-Off ah 'chunglam remruatnain' a tawpni ah "Table Topper" ah min hlangkai ta zawk a nih kha. Kha mi tuma kan player tho te, an awmdan sawisel hlawh tak te khan a hnu chiaha inkhel hmasa ber tun I-Day Trophy ah ngei FAIR PLAY Award, Card hmu tlem ber team hnena pek thin, induhsakna avanga inpek ngawt theih nilo he lawmman hlu tak an rawn hlawh chhuak hi chu "DIVINE JUSTICE" a ka tilo theilo a ni.