Club History
Mizo zawng zawngte huapzo tur football club din tha tiin ngaihtuahna nasa tak a lo seng a. Mi thahnemngai leh football chawisan duhtu Pu Benjamin Laldinpuia, Pu Dengchhuana (L), Pu Thangtinkhuma (L), Pu Zoramsangliana, Pu K.S. Thanga, Pu Thanhlira, Pu Lalremsanga, Pu, VL Ruala, (L) Pu Ngurdingliana, Pu Laldingngheta (L), Pu Thanhlira te leh midang sawm khawmin kum 1984 khan Aizawl Football Club hi din a ni a. Hmathlir thui tak nei chungin mumal takin AFC chu enkawl a ni a. Sap rama Football club kalphungte nen kawng tam takah inanna an nei a. An tum dan chuan an club puala ground puitling neih te, sum hnar tha tak neih theih dan tur te, neitu bik awm loin mipui ta nihtir te, players hlawh tak tak neia khelhtir te, Mizoram pawn lama Mizo player tha a tam thei ang ber seng luh te leh hmachhawp dang lian tak tak an neiin, India ram chhunga football club inelna sanga champion nih te tumin theihtawpin hma an la a. Heng an thil tum tak te hi tih hlawhtlin a ni hlawm a. Mizoram chhungah chuan hriat an hlawh viau a. An hmathlir a thui si a, khatih lai khan All India Football Federation hi mumalin a kal loh lai a lo ni ve bawk nen, A.F.C hian Mizoram pawna an tum ber India ram champion nih an tum chu an ti hlawhtling thei ta lo a ni.
AFC a lo din khan sawrkar department enkawl football club tantu tamtakten an tan lam an thlâk sup sup a. Zo hnahthlak players tha, Mizoram pawna awmte zawngin Myanmar, Manipur, Meghalaya, Tripura leh Bangladesh te thlengin an intir a. An jersey pawh India ram a mi mai ni lo foreign atangin an chah lût a. An jersey hmaah Hotel Ahimsa tih te, Hotel Rajj tihte an ziak a, an jersey hnung number ziahna chungah Aizawl tih an ziak deuh zel bawk a. An tihdan phung chu sap ram rimte pawh a nam rum rum a. Department enkawl club-a khel player te pawhin an hna bansanin AFC an zawm a. Hlawh mumal tak an pe thei deuh zel bawk a, hna tha zawk pek te tiamin players tha an seng lût nual a. AFC chu din a nih hnu lawkah sawrkar department enkawl club te nen pawh an inkhing tawk chho ta viau a ni.
AFC chu din a nih hnu kum linaah player te pawh an nei tha ta viau a.An hruaitu hmasate inpekna a thûkin an thawkrim hle a. Tournament lian tham vak loah champion te pawh an ni a. Kum 1987-a Mizoram Football chanchinah tournament lian leh khatih laia champion tana pawisa fai awm tamna ber Laldenga Gold Cup ah khelin, semi final-ah ARC, Shillong an hneh lo hlauh a. Mite hriat an hlawh chho zel a. Kum 1988 a lo thlen phei chuan Independence Day Football tournament ah khatih laia team tha tak PWD S.C chu final-ah hnehin champion a ni a, he tournament ah vek hian kum 1996-ah final lût lehin an khingpui Republic Veng GSA hnehin champion an ni a. Kum 1988 hian Sanjay Gandhi Memorial Football Trophy-ah team 14 tel zingah champion an ni leh a, hemi tum hian Power Dept SC chu final ah an hneh a. Kum 1989 khan Pachhunga Memorial Football Tournament ah team 12 tel zingah final lutin final a an khingpui PWD SC chu hnehin champion an ni leh a, he tournament ah vek hian kum1994 khan final lut lehin an khingpui Mizoram Police lakah an vanduai hlauh thung.
Hun eng nge maw tichhung chu AFC hian Zoram football ah chawlh a la zawk a. Chumi hnuah Pu Lalthankima (L) kaihhruaina hnuaiah kum 1996 kha thar tawh leh a ni a. An inpekna a thuk tehlul nen harsatna engnge maw vangin kum thum hnuah a tawp leh ta a ni.
Mizo Football Management Group tia hming invuahin Aizawl Football Club muhil tawh chu kaih thoh leh a ni ta a. . Kan thenawm a Khasi club pakhatin Mizo footballer tha te hmang tangkaia I - League an khel phak ta mai hi kan lawmpui rualin, hetiang dinhmunah hian ding ve thei kan ni tih hi `kan sawi fo thin a, ke pen chhuak an awm silo a, huaisen takin tihian keini ho hi kan in tel khawm a.Kan hmalam a harsatna awm tur tam tak te hmuh kan luiin ; Mizoram atanga I - League khel phak an awm ve thei a ni tih mitthla chungin kan lo pen chhuak a. Sum leh pai bul tanna tur pakhat mah kan nei lo a, Mizo mipui te kan thahnemngaihna min tawmpui turin kan sawm che u a ni.
India leh Asia khawmualpui huapa football kalphung a insingsak fel mek lai hian AFC tih hi Asian Football Confederation tih lam tawi nen a in ang chiah a. Hmatlir thui zawk leh tihdan tha zawk nia hriain, AFC tia ziak lovin Aizawl F.C tia ziah zawk zel tawh tur a ni ang.
HMALAK TUM DAN
1. Aizawl FC hi a neitu leh enkawltu te inthuk ru a, Mizo mipui zawng zawng lenna leh neitu nihna an neih theihna tur a hmalak.
2. Mizo mipui a tam thei ang ber Aizawl F.C club member ni thei tur a membership drive a theih ang a nasa hmalak.
3. India ram leh Mizoram in a phak tawk ang a club changtlung tak ni tur a hmalak.
4. Club management, administration, technical, marketing kan phak tawk ang zel a mumal leh tha thei ang ber a siam. Hengah hian club office, club training ground, youth team leh academy thleng a neih tum a hmalak.
5. Aizawl FC in club colour leh logo a lo neih tawh te hman chhunzawm zel.
6. State pawn leh foreign club leh management group te nen a theih ang a tam a hmalak ho leh thawhpui tur a hmalak.
7. India ram chhung leh ram pawn atangin sum hmuh theihna tur kawng zawn.
8. Youth Developement ngai pawimawh.
9. Kristianna leh Mizo hnam chawisang tura hmalak.
10. Asian Football Confederation (AFC) in club criteria a duan te kan phak tawk ang zel a zawm.