Aizawl FC: Mizo Football Team zinga 2nd Division I-League Final Round inpet thleng thei hmasa ber.
Ni 20 Feb 2012 Nilaini dar 4:30 a ni a, Mizoram State Day niin, Mizoram-in State a hmuhna ni champha tak a ni a, Silchar-a Mohan Dev Stadium-ah Mizoram leh Silchar leh a chhehvel atanga kal khawm Mizo awm tawh phawt chu a lutuk awm lo-in an au a, an zuang a, an te chel chul mai. An lawmna chu tutan mah khap sak chi an ni lo, Mizoram atanga a vawi khatna turin I-League inpettlin theihna atana tehna hmasa chu 3-0 a Sikkim United hnehin Aizawl FC ten an paltlanga, Final round an inpet thlen tak vang a ni.
NFL a nih lai Kum 2001 khan Dinthar FC te chuan Preliminary Stage lo khel tawhin a bak an pel thei lo hlauh a, 2003 khan First MAP FC ten group stage lo khel tawh bawkin vanduaithlak takin stage sang zawk an inpet thleng zo lo leh hlauh bawk. Hun a kal zel a Mizoram-in I-League mai ni lo-in India National Team-ah hial player an thawh tawh hnu-ah pawh a team ang erawh chuan I-league chu sawi loh Qualifying khel pawh an awm zui ta lo. Kum 2011 a inherchhuah meuh chuan Mizo-te football-a an tuihalna chu Aizawl FC hmangin puanchhuahin a awm chho ta a ni. Football Hmangaihtu pawl Mizo Football Management Group te chuan Aizawl FC reitak muthlu chu kaitho leh in Aizawl FC chu an dinthar leh a, Aizawl North FA-ah 3rd Division Team pakhat angin an in register thar leh a, Academy-te dinin Mizo rawlthar rual U-14, U-17 leh U-19 atan an la khawm ta nghal a, a dinthar leh kumah I-League qualifying khelh nghal an rel ta chuk chuk mai a ni. An thawhrimna avangin an tumna chu a takah an chantira, AIFF-ah Criteria atana thil tul hrang hrangte submit-in AIFF pawh chuan I-League 2nd Division khel turin phalna a rawn pe fel ta bawk.
January ni 30 a rawn inherchhuah meuh chuan I-League khel turin Aizawl FC team players leh Official te chuan Silchar lam beiseina sang tak nen an pan ta a ni.
February ni 1 a ni a Aizawl FC hruaitute dream chu a takin a chang ta e, Meghalaya Club tha Arhima FC nen Silchar-ah 2nd Div I-league match hmasa ber an khel ta tak tak e. Mahse tum ang ngawt a lo ni lo, a vawikhatnaah 3-1 ngawtin Arhima FC lakah an tlawm nghal der mai. Inkhel thunun zawk mahse player-te nervous vang nge ni goal an thun thei tlat lo, 1-1-a in draw mek laiin Keeper tihsual avang liau liau-in hun tawp dawn 80 minutes hnu lamah goal hnih ngawt mai Arhima lamin an rawn tiluta Chak lo-in Aizawl FC in bul an tan ta phawt a ni.
4th Feb 2012-ah Kolkata club Bhawanipore FC nen match hnihna an khel leh a, hemi tum hian Bhawanipore lam hian an khel tha-in Aizawl FC nen hian an inhneh tawk hle. Vanneih thlak takin Aizawl FC te hian 2-1 in hnehna an chang ta hram a ni.
4th Feb 2012 ah Kerala club Eagles FC nen match thumna inkhel lehin Aizawl FC lam hian an hneh hle a, goal chance tha tam tak an hloh chungin 4-0 ngawtin hnehna an chang a ni. Next round khel tura beiseina a sang tan hle mai.
10th Feb 2012 ah a thlengtu Assam club Green Valley nen match lina an khel leh a, Green Valley lam hi fans nen nasa takin an rawn tang a, he tournament chhunga fighting spirit nei tha ber leh team taima ber an ni a, Aizawl FC nen pawh an inchai tawk hle mai, goal inpe lo-in an tin a, Arhima-in eagles FC an lo hneh ve bawk si avangin Aizawl FC tan chuan chance a chhe tan hle mai.
14th Feb 2012 a ni a, Kolkata Club Southern Samity nen an match nga na an khel a, Aizawl FC next round khelh duh chuan chak ngei ngei a ngai a, chak loh chuan chance a awm tawh lovang. An chak zo dawn tawh lo emaw tih hnu-ah goal khat an tilut hlauh mai, 1-0 in a hun takah hnehna an chang e. Mahse vanduaithlak takin hemi ni hian Aizawl FC fans zinga a mi Malsawmthanga chu gallery atanga tla-in a thi ta hlauh mai a. Aizawl FC lam lawm a kim lo a, an chakna pawh Malsawmthanga tan hian an hlan nghal bawk a. Next match-ah ribbon dum hren vek chu an thutlukna a ni a. Malsawmthanga hriat reng nan a lehpek pawh an khel dawn a ni.
20th Feb 2012 a ni a, Aizawl FC – 10 points, Arhima FC – 11 Points, United Sikkim – 13 points niin Final Round lut sa an ni. Aizawl FC tan chak loh emaw, draw emaw a thiang tawh lo a, United Sikkim chu an hneh ngei ngei a ngai. A hmaa an lo ruahman lawk ang ngeiin Malsawmthanga sun nan match tan hma-in ngawi rengin Minute khat an ding a, Players te chuan ribbon dum an banah an rawn hren bakah, Malsawmthanga sunna banner an rawn kenglut-in Subtitute thutna hnungah an tar nghal bawk. He match-ah hian Aizawl FC te hian passing game mawi tak khel-in Abey, Michael leh Biaktea te goal nalh leh class tak tak hmangin 3-0 ngawtin hnehna an chang a. An tum ram hmasa 2nd Division I-League Final round chu an inpetthleng ta a ni. Player-te inpekna leh fighting spirit a ropui a. Hetiang anga fighting spirit tha tak nena an khel chhunzawm thei a nih ngat chuan I-League pawh hi Aizawl FC hian an inpet thleng thei ngeiin a rinawm.
Hun eng emaw chen hnu-ah Silchar inkhelh chanchin tlangpui kan han khai khawm leh hnuhnawh a ni e (Editor)