Aizawlfc.com Tlangzarh leh Press Conference
Vawiin khan Aizawl FC website www.aizawlfc.com chu Minister Pu PC Zoram Sangliana'n Aizawl Press Club ah a duh apiang tlawh theih turin a tlangzarh ta. He hun hi Aizawl FC president Pu Robert Romawia Royte in kaihhruaiin Parliamentary Secretary Pu KS Thanga pawhin thu a sawi bawk.
Mizoram a football chawisan duhtu, mi thahnemngai engemawzat inhlawmkhawmten kum 1984 a an din, Aizawl Football Club chu football khawvel atanga kum 13 zet a reh hnuin, nikum July ni 13, 2010 khan kohkir a ni leh ta a. Vawiin hian I-League Qualifying Round khel turin a inpuahchah mek a ni.
Aizawl FC hian Senior Team, Under 14, Under 17 leh Under 19 team a enkawl mek a, an vai hian Aizawl a football khelmual hrang hrangah, AFC ‘C’ License nei coach te leh NIS Diploma neite hnuaiah training an nei mek a ni.
Aizawl FC hian February thla tir atang khian I-League Qualifying round a khel dawn a, Group I ah team dang 6 te nen awmin, Silchar ah a khel dawn a ni. He qualifying round hi a paltlang thei a nih chuan I-League 2012-2013 Season a khel ve thei ang.
Aizawl FC hian Mizo naupangte chu an naupan laia football zirtirna pek a, footballer tluantlinga chherchhuah a tum avangin Youth Academy hi a ngai pawimawh hle a. Hei vang hian Aizawl leh a chhehvel hmun tam tak thlithlaiin, Academy hmunhma a melh mek a ni. Tunah hian hmun remchang pahnih a hual fel tawh a, Project buaipui mek a ni.
India team leh i-league a khel club engemawzatah Mizo tlangval te chu player pawimawh tak tak an ni mek a, hetihlai hian Mizo mipui tam berin ‘kan club’ tih fak tur kan la nei ve lo. Mizoten i-league a ‘kan club’ kan tih theih tur din tumin hma kan la mek a ni. Hemi kawnga Aizawl FC puitu hrang hrangte hnenah lawmthu kan sawi a. A bik takin Home Minister Pu R. Lalzirliana, Sports Minister Pu Zodintluanga, 26th Assam Rifles, Mizoram Football Association, Aizawl North Zone Football Association, SSA Aizawl District, Mizoram Police leh Sports & Youth Services Football Team hnenah min puihna tam tak avangin lawmthu kan sawi a ni.
Vawiina tlangzarh tak www.aizawlfc.com ah hian Aizawl FC chanchin kimchang leh Club thuthar ber berte hmuh theihin a awm a, hmun hla zawk atanga Club member ni duhte tan pawh membership fee leh donation pekna kawng hawn a ni.