Aizawl FC Vs Sikkim United
Ni 20 February 2012, Thawhtanni chawhnu dar 2:45 hian Aizawl FC te chuan I-League 2nd Division Group Stage-a kan match tawp berah Sikkim United kan khel dawn.
Vawiin lam inkhel-ah Sikkim United hian Arhima FC chu 2-0 in an hneha, Tihian, Sikkim United hi Final round an inpet thleng ta a, Team khat tana hmun ruak la awm hi, Aizawl FC, Arhima FC leh Green Valley ten kan la inchuh dawn a. Tun dinhmun-ah chuan Aizawl FC te kan dinhmun a tha hle. Match 6 theuh khelh turah Eagles FC in Match 6 khel tawhin an khelh tur zawng zawng an khel zo tawh a, a bak zawngin match khat theuh kan la nei a ni. Aizawl FC te hi a hnuhnung bera inkhel tur kan nih avangin team dangte dinhmun hresa in kan inkhel dawn a. Green Valley hian an match hnuhnung berah Bhawanipore nen an inkhel dawn a, an chak a nih chuan point 10 hmu-in goal diff hmangin final round inpet tlinna chance an la nei a. Mahse team pathum la tling thei zingah an chance a chhe ber kan ti thei awm e. Arhima FC hian point 8 hmu mekin, an match hnuhnung berah Southern Samity nen an inkhel dawn thung a, anni hian hnehna an chang a nih chuan Point 11 hmu-in Aizawl FC leh Sikkim United te inkhel thaw dep depin an thlir dawn a, beiseina sang tak an la nei thei dawn a ni. an chak lo emaw an draw hlauh a nih chuan final round an lut thei dawn lo chiang sa a ni.
Aizawl FC te kan chance a tha hle a. Kan sawi tak angin midang inkhel result hresa-in kan inkhel dawn a, Kan vannei a nih chuan Final round lut sa-in kan match hnuhnung ber hi kan khel thei dawn a. A nih loh chuan Final Round thleng turin, kan match hnuhnung ber hi draw emaw, chak ngei ngei emaw a ngai dawn thung a ni.
Kartawp-ah hian Aizawl FC Management committee chuan Sikkim United nena kan match a huho a en theih dan tur an rel dawn a. Silchar lamah a thei a piang kan player-te tawiawm turin thawhthlak leh kan tum dawn a ni.
Tin, Aizawl FC te hian Southern Samity te 1-0 a kan hnehna kha min tantu thi ta Malsawmthanga tan kan hlan a, kan match dawt leh Sikkim United nena kan inkhelh leh tur pawh hi Malsawmthanga tan leh hriatrengna atana hlan chungin kan khel leh dawn bawk. Player-te hian Malsawmthanga Sunna leh zahna entirnan inkhelh dawnah Ngawi rengin minute 1 an din dawn bakah Puan dum an banah an hreng dawn bawk a ni.